1. البوس البوس .. الحضن الحضن :
كل الفيروسات اللى بتنقل البرد بتنتقل بالعطس والرذاذ والإفرازات التنفسية والملامسه الجلدية وفترة حضانة معظم فيروسات البرد من ٣-٧ أيام يعنى ممكن تكون حضرتك كراجل كبير وانتى كطنط كبيره كده مش ظاهر عليكى أيتُها أعراض وتبوسى نونو أو طفل على سبيل المجامله ترزعيه دور إنفلونزا يرقّدُه فى السرير ووداع يا دنيا وداع .
فبلاش موسم الشتا بوس ابوس ايديكم
2. يوم الجمعه الجميل وبر الوالدين أهم من أبوك وأمك :
احنا كمجتمع عربى متماسك بنعشق التجمعات - وده ممتاز على فكره وصلة الرحم هيا اللى مميزانا وبشجعها طبعا - بس مش لازم نحط التاتش بتاعنا ياخوانّا ياخوانّا !!
ميبقاش أطفال بيكحّوا ويعطسوا وطبيعى جداً هيلعبوا مع بعض و يكحوا فى " بُؤّ " بعض و"نتكسف" نقول معلش أنا همشى عشان ابنى مناعته ضعيفه وبيلقط بسرعه .أو "نتضايق" لما نلاقى أهل الولاد بعدوا ولادهم عن بنتك اللى بتكحّ ..
الصحّ فى الحالات دى حاجة من التلاته :
يا إبنك يلبس mask الفتره البسيطه دى😷 .
يا تعتذرى عن التجمعات عشان ميعديش غيره .
يا أهل الأطفال الأصحّاء يعتذروا ويستأذنوا لأى سبب .
معلش الحق أحق أن يُتّبع ومحدش هينفعك لو إبنك اتحجز بالتهاب رئوى فى المستشفى .
3. أصل ابنى مبيطيقش ال Mask 😷 :
كمية أمهات لا حصر لها بتقولّى مستحيل إبنى يلبس القناع على وشّه وانا معاها فى ده هوا بيخنق فى الأول إنما بالتعوّد هيختفى تماماً الشعور ده ، ثقافة ال Mask دى لازم تنتشر بينّا عند أى حد مُعدى عنده برد سواء كان معانا فى البيت أو خارجين برّه أو أى تجمعات زى المدارس ودور العبادة والحضانات والتجمعات فى النوادى أو الألعاب .. الموضوع ده إجبارى بالمناسبة دلوقتى فى الأماكن العامة فى المناطق المصابة فى الصين ، و ممكن نحتاجه قريب ربنا يحمينا لو الأخ كورونا شرّفنا هنا - إن شاء الله ميحصلش . وممكن الأمّ ترسم عالقناع بالألوان سبايدر مان أو أى شخصية محببه للأطفال عشان ميزهقوش .
متتخيلوش القناع ده ممكن يشيل أذى قد إيه !
فنلبس القناع كده بالهداوه بدل ما نلبس كلنا فى الفيروس 😊
4. ثقافة غسل الأيدين بالمياه والصابون :
غسيل الأيدى فى العالم كله المقصود بيه soap and water إنما عندنا فى بلدنا بالمياه بس ..
طبعا مش محتاج أقول إن الفيروسات ممكن تنتقل بلمس أى جزء من جسم المُصاب لو عليه الفيروس - عطس مثلاً و جزء من الإفرازات جه عاللبس - وبعدين المصاب ده غسل إيده بالمياه بس وسلّم على الناس .
عزيزى المُصاب .. أنت لا تزال مُعدى أستأذنك إغسل يديك بالماء والصابون قبل السلام على الناس .
فنتفادى ده بإننا برضه نغسل إيدينا بالمياه والصابون بعد السلام وملامسة أى حد عنده برد .
5. الحضانات والمدارس وما أدراك ما الحضانات !
شوفو بأه يا مدرسين ويا مسئولين ..
أصل قدامكم حل من اتنين يا إما كده والله والله تبقو بتخونو الأمانه بلا نقاش ..
يا إما الطفل اللى والدته مسلّماه ليكم الصبح بيكحّ وبيطلع إفرازات ده و سخن ترفضو تستلموه و بكل أدب توضحوا للأمّ إنه هيِعدى كل الأطفال بلا نقاش . وتدوه أجازه ٣-٥ أيام .
يا إمّا يكون عندكم أوضه للعزل تكونو موفرين حدّ كبير يقعد معاه ويلاعبه لوحده والحد ده يلبس ماسك أو الطفل يلبس ماسك ويتغسل إيده كل شويه بمياه وصابون .
إنما مينفعش يدخل وسط الأطفال ويكحّ ويعطس لإن ولاد الناس أمانه فى إيديكم ، والسيطره على إفرازاته صعبه جداً حتى لو لبس القناع لإنه هيحتاج ياكل أكيد وسط الولاد وهيعديهم .
تخيل طفل غلبان بيكحّ وبينشر الفيروس وحواليه أطفال وكلهم بيلعبو معاه تقدر تسيطر عليه أو تمنعهم ؟ تخيلت ؟
البس يا معلّم !
6. ثقافة "مش مغيّباه من المدرسه إلا امّا العيا يهدُّه" :
لو إبنك راجع من المدرسه "همدان" "مصدع" "ساكت على غير العادة" أو "مش أكتيڤ"
ومع الحاجات دى رجّع أو بطنه بتوجعه أو بدأ يزكم أو يرشح .. نصيحة لوجه الله والله ..
غيبيه يوم واحد بس وخليه ينام كويس ،، واعمليه شوربه دافيه واعصرى عليها لمون كتيير ..
هوا كده في مرحلة "غزو ڤيروسي "غالباً أو "فترة حضانة الميكروب" قبل ظهور الأعراض ..
والجسم بيحتاج راحة وسوايل وعدم تعرض لعدوى بالذات أول يوم ..
تانى يوم هيبقى زي الفل وينزل المدرسه ..
تاخدى أجازة من شغلك يوم تقعدى بيه أحسن ولا تغيبي غصب عنك أسبوع بتعالجيه في البيت وبتلفى بيه عالدكاتره؟؟
اعقلوا الكلام ياخوانّا 😃
طبعاً دى ٦ ملاحظات شديدة الأهمية لينا حتى لو كورونا ده مشرفناش ، مهمة جداً لمنع انتقال العدوى الفيروسية التنفسية بكل أنواعها والله ..
فيا ريت تلفّ الفيس كله انهارده ويا رب نستفيد بيها !
ناس كتيره هتفتكرنى ببالغ .. أنا مش ببالغ والله ده ألف باء مكافحة عدوى و مبادئ وقاية
يارب الناس تفهم ان دى مش وسوسه ولا خوف زايد دا عقل ..
والله الحافظ وربنا يحفظنا ويحفظ صحتنا و أطفالنا جميعاً 🌹
تعليقات
إرسال تعليق